الجمعة، 8 يناير 2010

تعلم ، كيف تشرب القهـــــوة !!!!!!!


في إحدى الجامعات التقى بعض خريجيها في منزل أستاذهم بعد سنوات طويلة من مغادرة مقاعد الدراسة....

وبعد أن حققوا نجاحات كبيرة في حياتهم العملية ونالوا أرفع المناصب وحققوا الاستقرار المادي والاجتماعي وبعد عبارات التحية والمجاملة ، طفق كل منهم يتأفف من ضغوط العمل والحياة التي تسبب لهم الكثير من التوتر

'^'^'^'^'^'^ '^'

وغاب الأستاذ عنهم قليلا ثم عاد يحمل أبريقا كبيرا من القهوة، ومعه أكواب من كل شكل ولون:
أكواب صينية فاخرة ، أكواب ميلامين، أكواب زجاج عادي ، أكواب بلاستيك ، وأكواب كريستال..... فبعض الأكواب كانت في منتهى الجمال تصميماً ولوناً وبالتالي كانت باهظة الثمن ،
بينما كانت هناك أكواب من النوع الذي تجده في أفقر البيوت

'^'^'^'^'^'^ '^'
قال الأستاذ لطلابه:

تفضلوا ، و ليصب كل واحد منكم لنفسه القهوة. وعندما بات كل واحد من الخريجين ممسكا بكوب تكلم الأستاذ مجددا

هل لاحظتم ان الأكواب الجميلة فقط هي التي وقع عليها اختياركم وأنكم تجنبتم الأكواب العادية ؟؟؟

انه لمن الطبيعي ان يتطلع الواحد منكم الى ما هو أفضل ولكنكم لم تفعلوا ذلك!!وهذا بالضبط ما يسبب لكم القلق والتوتر

ما كنتم بحاجة اليه فعلا هو القهوة وليس الكوب!!

تهافتم على الأكواب الجميلة الثمينة.....و بعد ذلك لاحظت أن كل واحد منكم كان مراقباً للأكواب التي في أيدي الآخرين

'^'^'^'^'^'^ '^'

فلو كانت الحياة هي القهوة

فإن الوظيفة والمال والمكانة الاجتماعية هي الأكواب

وهي بالتالي مجرد أدوات ومواعين تحوي الحياة

ونوعية الحياة (القهوة) تبقى نفسها لا تتغير

و عندما نركز فقط على الكوب فإننا نضيع فرصة الاستمتاع بالقهوة وبالتالي أنصحكم بعدم الاهتمام بالأكواب والفناجين

وبدل ذلك أنصحكم بالاستمتاع بالقهوة

'^'^'^'^'^'^ '^'

في الحقيقة هذه آفة يعاني منها الكثيرون فهناك نوع من الناس لا يحمد الله على ما هو فيه مهما بلغ من نجاح لأنه يراقب دائما ما عند الآخرين

اذا تزوج بامرأة جميلة وذات خلق يظل معتقدا ان غيره تزوج بنساء أفضل من زوجته

ينظر الى البيت الذي يقطنه ويحدث نفسه ان غيره يسكن في بيت افخم و ارقى ، وووووووووووووو

وبدلا من الاستمتاع بحياته مع اهله و ذويه يظل يفكر بما لدى غيره ويقول :

ليت لدي ما لديهم!!


يا ترى ، كم منكم من فهم ما بين السطور؟؟؟؟؟؟؟؟؟؟؟؟؟؟؟؟؟؟؟؟




الثلاثاء، 29 ديسمبر 2009

إلى متى؟؟؟؟؟؟؟؟؟؟؟


عمرها ما صارت في الكويت هالبربسة اللي قاعدين نشوفها ونسمعها!!

نائب يحرض فئة معينة يسوون مظاهرات عند مجلس الامه!!
ونواب يحرضون الشارع العام - اللي من نفس طينتهم - ويقومون بمظاهرة ماصارت ولا استوت بشوارع الكويت ، يعني محتجين على مادري شنو!!!!

وواحد فاتح له قناة فضائية وطايح له تهزيء بالناس ع الفاضي والمليان وبألفاظ قبيحة...
وووووووووووووووووووووووووو
بالله عليكم ، من متى الكويت فيها النماين ؟ من متى اهل الكويت - الاصيلين وبس - يتعاملون مع بعض بهالطريقة وقلة الادب هذه؟؟؟؟ من متى اهل الكويت الطيبين يسبون بعض ويفضحون بخلق الله بالتلفزيون والجرايد ومن على المنابر؟؟؟؟؟؟؟؟
ابي افهم ، الربع من بيقلدون؟ عبالهم بأي بلد عايشين؟؟؟؟؟

وبالله عليكم ، هالنواب المسخرة ، اللي تاركين مصالح الناس ومصالح البلد والمشاريع التنموية اللي كلما حبوا يطيرون وزير قاموا يدغدغون مشاعر الكويتيين بمواضيع سخيفه وتافهه ومرات بمواضيع حيويه ،حتى يصدقونهم! والمصيبة انهم بس يصارخون ويجعرون يعني فعل ما في.... الشرهه مو عليهم الا على الـ ........ اللي عطوهم صوت ، الا بعد اذا كان اللي معطيهم صوت عارف ومقتنع بعمايلهم ، بعد هذه الطامة الكبرى ، وعليج السلام يا كويت ...

مساكين ، فهموا كلمة ديمقراطيه غلط ، هذا اذا بالاساس كانوا يعرفون معاناها....
واذا يبون ديمقراطيه ، اذن من حق كل كويتي عطى صوته لنائب ان يقف امام هذا النائب ويقول له بأعلى صوت : هي وقف ! وين رايح ؟ وين مصالحي ؟ وين التنمية والاصلاح ؟ وين وين وين؟
ومن حق الكويتي حتى يوقفه امام القضاء حتى يقص الحق من نفسه.... واذا كان هذا النائب محصن ، من حق المواطن يحاسبه حتى في حال انتهى دوره بالمجلس ، ساعتها ما في حصانه ، وخل يدور له على حصان يطير فيه ........
ومن حق الكويتي يطالب ان يكون النائب يحمل جنسية واحده فقط لاغير ، الجنسية الكويتية وبس س س س س س س س س !!!! نقول بعد شنو من حق الكويت؟؟

اليوم يومكم يا عيال ، الكويت تناديكم ، انقذوها من اغتيال الحفاة الرعاة ،،،،،،،،،،،،،،،،،،
اللهم احفظ كويتنا
اللهم احفظ كويتنا
اللهم احفظ كويتنا
اللهم احفظ كويتنا
اللهم احفظ كويتنا


الاثنين، 7 ديسمبر 2009

ان لم تستح فافعل ما تشاء !!!!!!!!!


مسرحية جديدة من مسرحيات قلة الادب دارت احداثها في ساحة الاراده اليوم المساء .. ما بقى واحد من الحفاة الرعاة واهل خيطان ق6 ما حضر،، كالمعتاد تصفيق ع الفاضي والمليان،،،
المرة الاولى كانت "ارحل" (رحلت ارواحهم ماردت) وهالمرة "لا للسرية" والمرة الجاية الله يستر منها ما دري شراح يخنبقون!!!!!!!!!! المصيبة ان اللي قاعد يصارخ ويجعر العيب مغطية من راسه لريوله المشققة واسألوا من يعرفهم ترى راح تسمعون العجب العجاب....
الطراق الاول عقب هاللجة كانت ظهور الفاضل/ الدويله ، واعتقد ان الحقائق اللي قالها كانت القشة التي قصمت ظهر البعير (اي والله انهم بعارين)... ولو يستحى المسلم - مثلما قال الدويله - ما يطعن الدويله بظهره وهو جار له من 30 سنه ،،، وازيدكم من الشعر بيت ان لأهل الدويله وخاصه والده افضال على سيء الذكر والنتيجة ياحبايبي الخيانه والطعن بالظهر في سبيل المصلحه الخاصة ، نعم المصلحه الخاصة.... تعتقدون يا عيال - واذا غلطانه صححوا لي - الواحد من هالقرازعه تجيه الجرأة ان يوقف هالوقفات المخزية ويقول ما يقول جدام خلق الله الا ووراه من يحركه بالريموت كنترول؟؟؟؟؟؟؟؟؟ بالله ما يعلموننا لما يصيحون على خلق الله "ارحل" من البديل اللي هم بيحطونه ؟؟؟ أقول يخسون الا يخسون هم ومن والاهم ... اشوف انها طالت وشمخت .. مو ناقص الا هالحثاله تنادي وتتكلم باسم الشعب ، انا وعيري بنفهم : هذا اي شعب اللي هم يمثلونه ويحجون باسمه ، مير انها بس ق 6 بخيطان وجم عقيدي من هني وهناك..
ما اقول الا عيب عليكم وسود الله وجيهكم - فوق ما هي سوده - فشلتونا جدام خلق الله وجدام الضيوف الكرام اللي بيزورونا عشان المؤتمر... خليتوا الاوادم من جيراننا يتساءلون : ش علامهم بالكويت ؟ وش صاير عندهم؟؟؟؟
بس ما اقول الا صدق من قال " ان لم تستح فافعل ما تشاء.....

اللهم احفظ كويتنا ، اللهم احفظ كويتنا ، اللهم احفظ كويتنا ، وبارك في شيوخنا واخزي عدوهم....

اللهم آمين ...................






الاثنين، 16 نوفمبر 2009

ما هقيت !!!!


الحقيقه ، كانت مضيعه للوقت التجمع اللي اليوم واللي مسمينه "ارحل ، نستحق الافضل".....
ما ادري ش هالافضل اللي قاعدين يدورون عليه واللي توهم يفطنون انه ضايع منهم عقب هالسكوت سنين طويلللللللله!!!
مدونات تكتب ، وايميلات تنادي بحضور التجمع يوم الاثنين الساعة 7 مساء،،، يوم رحت - طماشة ولقافة - قعدت انطر وانطر ، مابقى صحفي ومصور الا ووصل ، الامن الله يجزيهم خير ويحفظهم موجودين مبجر ، والربع كراسيهم فاضيه لغاية الساعة 8.30 م..
عجــــــيب!!!! مو جنه المفروض المختبين المفروض اول الناس بالمكان ؟؟؟؟؟؟؟؟؟؟؟؟
ما ابتدوا الا الساعة 8.00م... وياليتهم ما بدوا............ والله فشلة وفضيحه ، انا بفهم هالصحفي الاجنبي اللي قاعد يكتب شلون كتب جعيرهم وصريخهم؟؟؟؟؟
ما يابوا شيء من عندهم ، دام انهم راح يستجوبون بالله ش حقة هالخبه والتجمعات اللي مضيعين فيها وقتنا ....
اللي حز بنفسي يا عيالي ان الحضور كلهم شباب بعمر الورد ما شافوا من الكويت شيء بعد ... ما عاشوا الكويت اول حتى يقارنونها بالحاضر ... يركضون ورا كل من يعلي صوته قبل ما يفهمون ش القصة ،،،،
كلنا الحاضرين بحدود الـ 100 تقريبا مع المصورين والصحافة... واحنا جم حرمة سطرين (10 حريم ما بطلوا سوالف من البدايه لين قمنا) ، انا قلت الحين المكان بيصير طق عصي...
نفس التبربر والتبربس مال كل مره بس يوم قام هاللي اسمه الهيلم ، ياليته ما قام ، شنو هالاسفاف ، شنو هالقلة الحيا ، شلون يتجرأ ويتلفظ على سمو الرئيس بألفاظ اقل ما ينقال عنها سوقيه ، استح على ويهك.. التجمع السلفي اللي انت تمثلة واللحية اللي تارسه ويهك ما علموك شلون تتحجى وتخطب بالناس ؟؟؟ هالدين اللي انت تمثله بكل مكان بالله ما تقول لي ش تعلمت منه اي شي من تعاليم فن الخطابه والادب وعدم جرح مسامع الناس بألفاظ مؤذيه ؟؟؟؟
والله فشلتوا روحكم ، لا يكون عبالكم باجي الحضور (من غير ربعكم) جايين عشان مصدقينكم ، الا جايين حق الطماشة واللقافة ...
لي وين بتاخذون البلد واهلها ، راح تشبون فيها حريجه ما يطفيها الا العزيز القدير ،
حسبي الله عليكم ، ناقصين عقول وبتخربون الدنيا وتقعدون حق مصالحكم اللي ما يعلم فيها الا علام الغيوب!!!!
حسبي الله عليمن على هالفتنه وعلى من والاكم ، اذا موجابكم طسوا بلا رده ....

يار ب احفظ ديرتنا وعز شيوخنا ، اللهم آمين ..........





الأحد، 15 نوفمبر 2009

كلنا عيال قريّــــــــــــة ، وكل يعرف اخيّـــــــه

احنا اهل الكويت ، اهل الطيبه والنخوة.. اهل الكويت الاصيلين من ايام ما كانت كوت صغير جميل ،، نحب بعض ونخاف على بعض ، ونفزع لبعض .. بالفطره ، احنا طيبين..

عشنا مع بعض بسلام ، الجيران بالفريج الواحد كانوا على قد الحال مع الميسورين ، عرب وعجم ، مسلمين ومسيح وحتى اليهود عاشوا بيننا بأمان...

واحدنا ما كان يقدر ينام وجاره يوعان وللا متألم ، الفزعه بالفطره.. واللي عنده يتقاسم مع اللي ماعنده.. صغيرنا يحترم الكبير ، والغني يعطف على الفقير.. عشان جذي رب العالمين كان مبارك لنا في كل شيء ، وحافظ هالبلد واهلها من الشر.

ما فرقنا وصول الكهربا ، ولا ظهور النفط... ظلينا متواصلين حتى يوم ثمنوا بيوتنا ، اكثرنا حرص انه يشتري بيت يم جاره اللي كان بالفريج.. تروح الايام وتمر ، وتبدأ النفوس تتغير ، وتبدأ البيبان تنصك بوجه الجار ، وصرنا الواحد ما يعرف منو جيرانه اللي ساكنين معاه بنفس الفريج !!!!!!!!!!!! يانا الغزو – الله لا يرد ايامه – ووحدنا وصرنا ايد وحده وصرنا نعرف جيراننا اللي سكنوا يمنا سنين طويلة وما نعرف منهم غير الاسم اللي معلق على باب البيت... ويفرجها ربي علينا ، ومع الاسف رجعت البيبان تتصكك بوجه الجار وزاد الشر بالنفوس وبدون سبب وصار اللي عنده يحسد اللي ماعنده!!!! من متى احنا جذي يا عيال الكويت ؟ بدت علامات الساعة تظهر فينا يوم العصاعص قامت والحفاة الرعاة لما تطالوا في البنيان وقعدوا على الكراسي الخضراء والسوده اول ما اشطحوا انطحوا ، صاروا يتطاولون على رموزنا !!!! رموزنا يا عيال الكويت اللي ما عرفنا غيرهم من فتحنا عيوننا على الدنيا ، رموزنا اللي كبروا وكبرنا معاهم ، رموزنا اللي ما عرفنا غيرهم شيوخ ولا نبي غيرهم ، لا والله ما نبي غيرهم ... اصحوا يا اهل الكويت يبون يفرقوننا ويقسموننا نصين ما بين مع وضد !!! الله واكبر ، ش قاعد يصير بالكويت ؟ ضد منو يحرضون ؟ ومن قصدهم يساندون؟ يبون الكويت تصير مثل باجي الدول صراعات وانقسامات الى ان تضعف وتصير لقمه سهله للطامعين ؟؟؟؟ لاوالله ما يتحقق لهم مرادهم ، ولا راح نعطيهم المجال يتطولون ، عيب والله عيب والف عيب ، تعدوا الخطوط الحمرا ومصخوها ، ونسوا ان اللي بيته من زجاج ما يحذف الناس من واذا رموزنا اللي هم عزنا وعزوتنا موعاجبينهم ، خل يرحلون ، نعم خل يرحلون ويشوفون لهم ديره غير هالديره فيهم خير يصارخون من على منابرها ويجعرون.. خل يدورون لهم ديره توفر لهم ربع من هالرفاهيه اللي متنعمين فيها على هالارض الطيبـــــة... خل يرحلون ويتركون لنا ديرتنا ، كويتنا احنا وبس ، عيال بطنها الاصيلين ومن يحبنا ونحبه....

يارب احفظ كويتنـــــا ، يارب احفظ كويتنـــــا ، يارب احفظ كويتنـــــا